Noskuantos na simåna sigiente i mafañågu-ña si Makåhna, måtto i pakyo Mawar giya Guåhan. Ti hu tungo’ na pau sen fotte i pakyo. Lao i diha an måtto i pakyo, fumofotte gui’ kada ora na maloffan. Este i primet na Super Påkyo para todu ni’ famagu’on-måmi. Guahu yan si Miget hagas esta manekperensia ham. Para i todu i famagu’on si Sumåhi, Akli’e’, Lulai yan Makåhna, tåya’ nai maneksperensia påkyo taiguihi.
Sen fofotte i månglo’ ya dururu lumaolao i shutters gi bentåna siha. Mumilak i ichan gi halom i gima’. Gof ma’å’ñao si Lulai. Fihu ha ågang para si Miget. Lao sen tinane’ gui’ sa’ ha na’påpåra i hanom pau na’halom i gima’. Para noskuantos na oras ha saosaosao i satge ni’ hanom.
Mansuette ham sa’ ti gof båba i dañu gi gima’. Lao para i sigiente na simåna siha tåya’ elektrisidåt gi entieru na isla. Maolek sa’ macho’cho’cho’ i hanom. Guaha meggai lugåt siha gi isla mantaihånom. Lao sen maipepepe despues di maloffan i pakyo. Ti maolek para i neni siha, si Makåhna yan si Lulai. Tres simåna ha’ si Makåhna gi ayu na tiempo. Sesso pinapåñåles ha’ i dos na neni gi minaipe gi halom i gima’. Manmasahahalom ham duru todu i tiempo ya gaibosbos si Makåhna yan si Lulai ginen i minaipe. Put fin ti siña manlangak ham, pues manhanao ham para un hotet para tres na diha. Nina’magof siha i dos neni. Put fin siña mumaigo’ siha gof maolek. Para si Lulai i mas maolek na palabra ni’ sigi’ ha såsångan, “Aircon! Aircon! Guaha aircon!”
Durånten este na tiempo, dumångkolo’ i dos påtgon gi me’nan-måmi yan si Miget.
Fihu manhånao ham gi Micronesia Mall kosaki siña in na’bula i batteria yan i tilifon siha. Ya siña mangosa ham aircon lokkue’. Ya-ña si Lulai Plåsan Funtastic. Gof malago’ gui’ målålågo guihi yan manatan huegon bideo achokka’ ti manhugåndo sa’ tai’idåt gui’.
På’go na tiempo guaha elektrisidåt yan manmamagof ham put ayu. Achokka’ guaha “loadshedding” an mapuno’ i elektrisidåt nu GPA sa’ man’na’famamaolek ha’ todu i sistema. Meses despues i pakyo, esta kuatro meses si Makåhna på’go. Mås aridondo, kiñute yan guaiyayon gui’, iyo-ku cinnabon. Lao bai hu sangåni mås put guiya yan i dinokko’-ña gi otro na tinige’-hu.
Siempre ti para u ma hasso si Lulai yan si Makåhna put este na tiempo gi lina’lå’-ñiha. Lao siempre ti bai hu maleleffa. Todu tiempo siña hu hungok i kanta as Microchild “Maloffan i Pakyo” gi hinasso-ku durånten ayu makkat na tiempo para i familiå-ku.
