Malilingu si Maria gi hinassosso-ña mientras mamomokkat gui’ mo’na gi halom I gima’Yu’os.
Ayugue gi me’nan i ata, i guinaiyå-ña si Jose yan i pale’ ni’ para u na’asagua este na dos.
Gi kada pinekkåt-ña, makonne’ gui’ mås tåtte gi hinasso-ña siha, para i tinituhon I guinaiyan-ñiha yan si Jose.
Fihu si Maria ha ripåra si Jose gi gipot siha, gi hiyong yan gi halom i gima’Yu’os, lao tåya’ nai kumentos i dos.
Fihu ha atan gui’ gi distansia. Ya guaha didok tinanga gi korason-ña put guiya.
Gof annok nu i familian-ña na sinekkai gui’ lao tåya’ tumungo’ håyi.
Esta guaha kånta matutuge’ gi halom i korason-ña para si Jose, lao ngai’an na u guaha chånsa para u na’tungo’ gui’ ni mismo siniente-ña.
Måtto i chansa annai trese åños i dos.
Mama’gågasi gui’ gi kanton såddok gi papa’ i pilan. Fihu sumiha yan i la’åmko’ na che’lu-ña, lao guihi na ogga’an ti maolek i sinientete-ña.
Pine’lo’lo’-ña na guiya maisa guihi, mama’gågasi. Kumånta gui’, ya gi kinatå-ña ha sotta didide’ i siniente-ña.
Puminiti yan mumahalang
Pumarereho i dos chetnot
Puminiti siña hu sungon,
Mumahalang esta pekno’.
Gotpe ha hungok chumeffla ginen i trongko siha gi tatte-ña. Tåya’ kandit-ña si Maria, lao ha li’e’ i hachon fumo’fo’na ginen i halomtåno’.
Ha hungok si Maria este na kanta:
Bunitayi, bunitayi
Apo’ magi gi apaga-hu
Ya u fa’na’gue hao puminiti
Ya un pininiti nu Guahu
Si Jose! Ha tungo’ i bos-ña esta åntes di ha li’e’ i matå-ña.
Humuyong gui’ ginen i halomtåno’, I hachon gi uno na kannai-ña, un gaugua gaiguihan gi otro. Ginen pumepeska gui’.
Kalang ti hongge’on i suette-ña. Este i momento hagas ha nanangga. Ha kontinuha i kantan-ñiha.
Esta bente yu’ fumaisen,
Hågu mina’bente unu
Hågu uttimo fumaisen
Hågu tåya’ parehu-mu
Ha na’oppan i guinaiyå-ña gi kanta, ya ha diseseha na parehu i siniente-ña si Jose nu guiya.
Parehu i siniente-ña lokkue’!
Ini’ina i chinalek-ña si Jose ni’ hachon-ña, mientras ha tutuhon kumåkanta:
Yanggen lulok bai hu hulok,
An kadena bai desåsi.
Bai atotga bumusero
Anggen gaige hao fondon tåsi
Parehu i siniente-ña! Kumahulo’ si Maria ginen i magagu ya tinektok as Jose.
Umachiku i dos para i primet na biahi gi papa’ i pilan, gi fi’on i saddok ayu na ogga’an.
