Maila ya ta hasuyi este na ehemplo put i lina’lå-ta. Konsidera un matai råmas ni mahlok gi un tronko giya sabåna gi isla-ta. Podong i råmas ya gumama gi saddok. Konsidera na hita este na råmas. Ta tatiye i kurenti masea månu i saddok hinanao-ña. Guaha na banda i saddok na katma, lao guaha lokue na chaochao ya mumetgot i korenti. I linalå-ta lokue guaha na pås i hinasso-ta, lao guaha lokue na bula atburotu yan malinek ulu. Lao gi hiniben-ta, gaige gi hinasso-ta na taya’ atburotu siña munadespåsio hit.
I råmas guaha siempre na manotpe imbaråsos siha ya pumåran naihon gi hinanao-ña. Este na punto gi linalå-ta anai guaha sineside, minalångu, pat achåki entre i familia pat i manga’chong. Didok na pininite ta eksperensia gi duranten mubimenton i linalå-ta. Lao hoben yan metgot i korason-ta ya put este na siña ta konsigi mo’na i hananao-ta.
I råmas sigi ha’ kinene’ nu’i korenti esta ki matto guihi na lugåt anai umadispatta i saddok kulan i dinga chålan. Este na momento gi linalå-ta anai ta konsidera para taimanu hit mo’na gi hinanao-ta. Ta disidi estaimanu para ta låla. Kao ta tatiye i manga’chong gi minagof hinanao-ñiha pat ta tatiye håfa mås maulek para hita yan i familia-ta. Lao siempre i mås sinseru na disision gaige gi para estaimanu para ta na fan låla i familia gi hinemlo yan minagof. Este gumiha i disision-ta ya ayu na chålan ta ayik yan ta tatiye.
I råmas ha kontinua mona i hainanao-ña gi saddok esta ki potfin matto guihi na lugåt anai umasodda yan i tasi. Estagui anai ta li’e estaimanu i dinangkulon i tano. Ma baba i måta-ta yan i hinasso-ta ya ta komprende pågo estaimanu i linåla, i kostumbre, i kutturan i manparehu ta guine gi tano. Ta kurihi mona i famaguon-ta para i dinanche na disision gi duranten i linåla-ñiha. Ta fanågue ni onra yan respetu para i mañaina, i manåmko, pat maseha håyi na prohimu yan kilisyånu. Ta fanague lokue para u marespeta i propiedåt taotao parehu yan iyon ñiha.
Alosuttimo, i råmas nai ha tutuhon i hinanao-ña ginen i sabåna, sigi mumañaña yan hinanom dispues hatutuhon måtmus gi tasi. Hita lokue, ta konsidera na esta pago munhåyan i karerå-ta guini gi tano ya pås i hinasso-ta yan i korason-ta. Pues este na momento anai ta hatsa i layak i galaide’ ya ta traba i timon para u tunas guåtu guihi na dereksion gi minachom i atdao asta ayu i munananga hit na palapåla giya para’isu yan i taihinekok na tiempo.
