Esta maloffan Mes Chamoru må’posña na mes. Lao para hami yan i familian-måmi, kada diha in silelebra na manchamoru ham kada diha noskuantos na moda siha. I mas dångkolo’ na moda ni’ manakuentutusi ham gi fino’ Chamoru kada diha. Maseha an humihami pat gi text message gi tilifon.
Todu ma silebra i eskuelå-ña si Lulai para un simåna. Kada diha guaha suheton ha’åni (theme). Pues hu na’beste gui’ para kada diha i simåna.
Diha Uno : Ha’ånen Mambiha/Mambihu
Diha Dos: Usa Chamoru na franela ya chule’ un lepbon Chamoru para un fanu’i i klas-mu.
Si Lulai ha ayek i estoria “Sumåhi Yan I Karabao.”
Ha kulot un åcho latte lokkue’ (inayuda gui’ nu guahu).
Diha Tres: Chule’ gollai pat frutas ginen Guåhan ni’ para un fanu’i i klas.
Linatråtu si Lulai yan i dagu gi halom i kettot ni’ hu tufok.
Diha Kuattro: Usa un flores na lei ya appåte fina’seppen Chamoru yan i klas-mu.
Diha Sinko: Usa magågun Chamoru pat magågun isla.
Manusa gui’ mestisa. Ha ayek i kulot di rosa na bestidu gi tendan manneni, Cutie Petunias, gi Sengsong Chamoru.
Nina’magof si Lulai sa’ guaha na biåhi gof dudus gui’! Ya ya-ña minagagu gui’ nu mikilot na bestidu pat magågu ya sappåtos!
Alasuttimo, esta gof na’magof na simåna para si Lulai! Gi finakpo’ guaha fiesta ya todu i famagu’on manggågånta “Kåten Kulo'” tinige’ as Frank Rabon yan Eric Reyes.
Biba Chamoru! Ti uno na mes ha’, lao kada diha todu diha!
