Dumadångkolo’ Si Lulai Kada Diha

Despensa yu’ sa’ åpmam desde manuge’ yu’! Gof tinane’ yu’ sa’ hu popoksai i neni. Lao nina’magof yu’ lokkue’ sa’ gof presiosu este na dikike’ na palao’an-hu. 

Esta gof meggai na “milestones” para si Lulai este na såkkan. Bai hu lista noskuantos gi este na post, kontodu litråtu siha.  

I fine’nena na biåhi ni’ ha lalacha’ gi tiyan-ña. 4 meses i idåt-ña. 

I fine’nena na biåhi na ha chagi i na’neni.  5 meses i idåt-ña.

I fine’nena na biåhi ni’ kumananaf gui’. 5 meses i idåt-ña.

I fine’nena na pålåbra-ña “mama”! <3  6 meses i idåt-ña.

I fine’nena na biåhi ni mata’chong maisa gui’ hulu’. 6 meses i idåt-ña.

I fine’nena na biåhi ni ha åyu’os otro taotao ya ilek-ña “hi.” Gi entre 6-7 meses i idåt-ña.

I fine’nena na biåhi ni tumachu gui’ yan i ayudånte. 7 meses i idåt-ña.

I fine’nena na biåhi ni ha pakpak i kannai-ña. 7 meses i idåt-ña.

På’go ha u’usa i palåbra siha “mama, neni, tåta, hi, munhåyan – annai pau kånno’ i na’-ña yan esta humåspok gui’. Lao ilelek-ña “mu-nå-na” fuera di i magåhet na pålåbra put este.

Ai! Esta mahålang yu’ nu guihi na tiempo annai mås dikike’ si Lulai. Lao gåtbo guini na tiempo sa’ ha fakchacha’i i tano’ gi oriyå-ña ya ha fakchacha’i iyo-ña chålan lokkue’ gi karerå-ña.