(Every week or so the Guam Museum will be sharing something in the CHamoru language about our history, culture and folklore. This week we are sharing part of the history of Spanish colonization and when Maga’låhi Hurao sought to defend his family from Påle’ San Vitores.)
Måtto si Magellan gi sakkan 1521 ya ha sodda’ i Islan Guåhan.
Lao ti ha sagåyi pat kolonisa i tano’-ta.
I tiempon makolonisa ma tutuhon gi diha 15 gi Huño 1668, annai måtto si Påle’ Diego Luis de San Vitores.
Måtto gui’ ginen España para u fa’nå’gue i taotao-ta put i rilihon-ña.
Ya anggen ti ma aksepta i rilion-ña, pues guiya yan i sindalu-ña siha, ma afuetsa i taotao umaksepta.
Para si San Vitores yan I Españot, ti manlibre i Chamoru para u ma sångan “mungga.”
Meggai na Chamoru ma aksepta si Påle’ San Vitores, lao meggai otro ti ma aksepta.
Uno ni’ ti ha aksepta si Påle’ San Vitores yan I nuebu na hinengge-ña, si Maga’låhi Matå’pang, Maga’låhen Tomhom.
Ha siente na si Påle’ San Vitores ha kekefunas yan diroga i kotturan CHamoru.
Chathinassosso-ña na i bendision i mamåle’ mismo matdision ya manmåmatai i famagu’on CHamoru kada manmatakpångi.
Gi diha 2 gi Abrit 1672, gaige si Påle’ San Vitores yan i ayudånte-ña si Pedro Calungsod giya Tomhom yan malago’ i pale’ tumakpångi i nuebu na hagå-ña si Matå’pang.
Kinahulo’guan si Matå’pang put este, sen ti malago’ gui’ na u matakpångi.
I Maga’låhi ha dulalak i pale’ yan i ayudante-ña ginen I gima’-ña.
Lao anai esta må’pos i tata, si San Vitores ha halomguan si Matå’pang gi gima’ ya ha takpångi i neni.
Nina’sen bubu si Matå’pang anai mana’tungo’ put este na malabida.
Guiya yan i ga’chong-ña si Hirao, ma espiha si San Vitores.
Ma usa i lansan-ñiha yan I macheten Matå’pang ya ma puno’ i dos.
