Dedikasion-hu para si Ruben Borja, gi idat trenta ånos, yan taotao Sinahana.
Ma hongang ham pa’go na simana annai ma ågang yu’ na måtai ungotpe uno nu i ‘Guam Boys’-mame ni sumasaga giya Seattle.
Este as Ruben sumen ga’chong yan i subrinu-hu desde maneskuelånte giya Guahan. I ‘Guam Boys’ – mina’sais na manhoben lålåhi, mansutteru, manmalåte’ yan mansen hongge’ i kutturan taotao-ta CHamoru. Guaha na tiempo mannisisita ma dingu i che’cho’-niha yan eskuelan-niha. Pues man måtto todu para i gima-mami para fan “chill out” yan manuha’ gi meggai kadukan gi siudån Seattle. Kada sakkan, ma chågi manmåtto yan i manatungo’-niha ni manCHamoru, lokkue’ para ma silebra i Liberation Guahan. Sen ya-niha mangupot Chamoru gi lugåt-måmi sa’ tåya’ para manestotba.
Para guahu yan i asagua-hu, sen na’magof yanggen in li’e’ i ‘Guam Boys’ manunu, manboka, mangimen, mankaduku yan mañålek dururu. En tungo’-ha na manmahålang nu i familian-niha yan i tano’-ta.
Inestotba yu’ nu i atditdit annai ma sangani yu’ pot i finatai Ruben sa’ sen na’magof yan sen maolek kostumbre-na todu i tiempo. Estague’ i tinige’-hu para bai onra si Ruben.
Adios Ruben
Tumangnes yu’ pago yan putiti i korasión-hu
Parehu i siñente-ku yan i chata’an ha’åni på’go.
Un dingu ham dimasiao tåftaf
Yan dimasiao hoben.
Hafa taimano este na pinadesi
Hafa na kinene’ hao as Yu’os pago’?
Hagu nu i sen na’magof yan sen na’chålek na hoben låhi
Tomtom hao na lahen Guahan yan sen kariñosa hao para todo.
Humuyong yu’ gi gima’ para bai gai fresko na aire
Hu ripåra na’ pumara umuchan
guaha dididi na somnak
Ya humuyong lokkue’ i sen ma’lak na kolot isa.
Hu siente hao gi fi’on-hu
Chumåchålek hao.
I chålek-mu muna’ aksepta yu’ nu i finatai-mu
katma yan magof yu’.
Siempre atditdit I manmahålang-måmi’ nu hagu.
Hu agredesi i minaolek-mu yan respeta-mu para hami kada mandaña hit.
Pues adios esta ke’ umali’e’ hit ta’lo’
Tai hinekok i mina’la’-mu gi langet
Sa’ siempre malak hao na pu’tioñ pumupulan ham
Si Yu’os un inesgaihon yan inbenendisi hao mo’na!
In guaiya hao mampos, Ruben!
Si Auntie Rose yan si Uncle Joel
