Kåtta Para i Famagu’on-hu

Buenas todus hamyo, i na’an- hu si Clarissa Mendiola ya bai hu apatte iyo-ku bideo “I Katta Para i Famagu’on-hu.” Hu fa’tinas esti na bideo para i Kasiyas na showcase ma’pos na sakkan. Sesso hu hahasso put i famagu’on-hu yanggen hu e’eyak i fino’-ta. Kao para u ma kuentos gi fino’-ta un diha? Kao siña ma siente banidosu put i kuttura-ta yanggen mañañasaga ham gof chago ginen Guåhan? Hu tanga na ma guaiya i fino’-ta taiguihi hu guaiya gui’.

Kåtta Para i Famagu’on-hu

Tinige’ as Clarissa Mendiola

Famagu’on-hu,

Kao en tingo hafa i mas takhilo na minalago-hu? Na en tingo hayi hamyo. Na en atan mamaisa hamyo ya en guaguiaya hafa en li’e’e’. Ya anngen en atan mamaisa hamyo, en li’e’e’ todu i mañaina-ta. I atadok-ñiha i atadok-miyu. I kurason-ñiha i kurason-miyu. I piniten–ñiha, i piniten-miyu. I minagof-ñiha i minagof-miyu. I guinahan-ñiha i guinahan-miyu.

Bai hu sangani hamyo ni minagahet. Annai dikike’ yu’ ti banidosu yu’ put i kuttura-ta yan i fino’-ta sa’ ti hu tungo hayi yu’. Dumangkolo’ yu’ gof chågo ginen Guåhan yan i tano-ñiha i mañaina-ta. Taya nai ma fino’ chamoruyi’ yu’ i saina-hu sa’ didide malingu i lengguahi-ta gi hinasson-ñiha lokkue’. 

Lao på’go, hu tungo’ hayi yu’. Yan esti i mas impottånte na cho’cho gi lina’lå-hu. Guaha na biahi bunito i chalan ya guaha na biahi na’piniti. Lao debidi hu tungo’ hayi yu’ sa’ yanggen hu tungo hayi yu’, siña en tingo hayi hamyo. Ya buente an kumuentos yu’ gi fino’-ta, en hihungok yu’ ya siña en hihungok i mañaina-ta lokkue. 

Un diha, yanggen esta hu dingo esti na tåno, para en kuekuentos ha’ gi fino’-ta ya siempre bai hu huhungok hamyo.

Hahasso: ma tayuyuti hamyo i manaina-ta taiguihi hu tayuyuti hamyo. Hamyo i guinifen i mañaina-ta.

Hu guaiya hamyo,

Si Nåna