(Every week or so the Guam Museum will be sharing something in the CHamoru language about our history, culture and folklore. This week we’ll something written by Dr. Laura Torres Souder in 2019 to commemorate the election of Lou Leon Guerrero as the first Maga’hågan Guåhan in Guam’s modern political history.)
Para u ma usa gi fine’nana na biåhi i Maga’håga gi i hestorian pulitikåt mudetnon Guåhan ya ufisåt na titilu para i nuebu na inilihen palao’an Gubetnadora. Dos pudet na poddong i finiho’ gi i Fino’ CHamoru: må’gas, ni’ kumeke’ilekña må’gas tradisiunåt patsino gi fino’ på’go na tiempo tåtkumu sinangan, hefen ekseketibu; yan håga, ni’ kumekeilekña akkaga. Sigun gi dinanña’ dos finiho’, este na fåmta’ disknasion metgot seknefekånte sa’ chenglong gi i hale’ sesteman finaloffan kostumbren mañaina gi inetnon susiåt yan hinanao kottura.
Para i mañaina-ta, i manmofo’na na tinaotao iya Mari’ånas, inagofli’e’ entre familia sentakhilo’. Gi fi’on i dibision manaotao, sinaonao gi i hale’ familia mampos seknefekånte para dinitetminan estao. Kinonsiste i dibision familia meggai na råmas ni’ mandanña’ para upblegasion kinalamten siha, taiguihi inayudon cho’cho’, gineftao nengkånno’ yan kantidån guinaha siha, uson tåno’, yan i aktebedåt siremoñas put lai ni’ mumåmanda kostumbre siha. Ginen pudet famalao’an na ma o’osge kinalamten påpa’ asta tinatten membron familia siha. Este na kostumbre ni’ chilong tåtkumu kinemprenden kinalamten famalao’an numåna’i pudet yan onra guatu gi i famalao’an Mañamoru.
Entre familia, idåt dumitetmimina titulu siha. Gof takhilo’ estao-ña i Maga’håga yanggen guiya i mås åmko’ na palao’an yan i che’lu-ña ni’ mås åmko’ na låhi gumo’te i titulon Maga’låhi. Metgot minantienen pudet ginen i dos para asunton familia yan guinaha. Ma ditetmimina i titulu gi mås saina ni’ tenga fine’nana na mafañågu na tinituhon desdeki sentakhilo’ asta sentakpapa’ taiguihi: bisa guela, guela, nåna, bisa tiha, tiha che’lu palao’an, prima primet grådu, yan akkaga. Este na esta tåtkumu goftakhilo’ na palao’an gi kumunidåt islå-ta ma pega na mo’nan hestorikåt guatu gi as Lou Leon Guerrero, Maga’hågan Guåhan.
