(Each week the Guam Museum will be sharing something in the CHamoru language about our history, culture or legends. This week is a CHamoru belief about not washing one’s hair before going to sleep, written by Peter Onedera.)
Eståba sumåsaga un påtgon Hagåtña yan si nanå-ña. Mampos este na påtgon gåsgas, ya kada diha umo’mak.
Un diha ilek-ña as nanå-ña, “Nanå-hu, buente bai hu hånao bai hu o’mak sa’ esta yu’ gof odda’ yan maipe yu’.”
Ilek-ña i nana, “Ai hagå-hu, mampos esta gef painge, båba umo’mak na ora. Nangga asta agupa’ yan manana. Yanggen fofotgon gaputilu-mu gi maigo’-mu, siña nina’malångu hao.”
Annai malingu mamaigo’ i nanå-ña, ma’pos ha’ i patgon umo’mak ti ha osge si nanå-ña. Ti ginacha’ as nanå-ña para u chinemma’ esta gof atrasao.
Humålom ha’ i patgon gi katre yan i fetgon gaputilu-ña ya mampos matuhok ti ha nangga na u ånglo gaputilu-ña.
Annai makmåta i patgon, ha li’e’ na echong i tengho-ña yan mahefong i gui’eng-ña. Ilek-ña si nanå-ña, “Ai adai, yanggen mohon un osge yu’, ti un taigueguenao pinadesi-mu yan hechurå-mu.”
Desde ayu na tiempo, ti u fano’mak i famalao’an yanggen esta puengi sa’ manma’a’ñao na u fanmafongfong gui’eng-ñiha yan u fanechong i tenghon-ñiha.
Hu hungok este na estoria ginen si nanå-hu yan si nanå-hu biha meggai na biåhi annai påtgon yu’