Hu hasso i tiempon ileksion annai hoben yu’ giya Inalahan. Guaha gipot siha gi sengsong. Guaha familia siha na gigipot antes i ha’ånen ileksion. Kada tiempon ileksion kulang parehu i familia siha na gigipot.
Anngen i ha’ånen bota, i gima siha gi hihot i sagan bota, guaha dankolo na gipot siha.
Enao na guma siha, i primet na lugat para i pattida siha. Guaha i gima para i Pattidan Demokrat yan guaha i gima para i Pattidan Ripåpblekan.
Antes i ha’ånen bota, guaha dinanña siha giya Inalahan para i pattida siha, i kandidåtu siha, i maga’lahen sengson, pot i maga’lahen isla. Meggai na gipot siha.
Anggen guaha gipot siha para i fandånggo, i båotismo, osino i matai, buente gaige i kandidåtu siha. Ginen i tiempon ileksion, manhosme misa i kandidåtu siha kada Damenggo.
Guaha meggai na “campaign signs” gi todu i sengsong anggen i tiempon ileksion. Ti hu tungo’ kao guaha palabra para este. Kao letreru, siñat, litratun sanhiyong, osino pinentan sanhiyong? Hekkua’. Lao manmeggai na “campaign signs” ginen i sengsong yan ki todu i isla ginen i tiempon ileksion.
Guaha ileksion chinina, tuhong, yan “stickers” lokkue. Kulang kalenturan ileksion.
Lao guaha kuttura-ta yan fino’-ta ginen i “campaign signs”. Buente ha pega i na’an i familia-ña i kandidåtu. Buente guaha i yo-ña “slogan” gi fino’-ta. Kulang todu i gima siha gi sengsong guaha “campaign sign” gi sanhiyong yan i sanme’na.
Hu hasso’ na guaha lugat giya Guahan na kada tiempon ileksion guaha “campaign signs”. Pot i ehemplo, gi “intersection” gi chalan Route 4 gi Chalan Pago yan i Route 10 para Mangilao gi samenan i gima Manibusan.
Ginen i tiempon ileksion guaha familia siha yan taotao siha lokkue, manatdet para i “gayu”-ñiha. Manu’u’sa i chininan ileksion, man pega i “campaign signs” gi sanhiyong gi gima-ñiha yan manéssalao para i gayu-ñiha todu tiempo.
I tiha-hu na gof ya-ña i Pattidan Demokrat yan si Bordallo yan si Gutierrez. Taya siña mancho’gue ba’ba’. I patlinu-hu, gof ya-ña i Pattidan Ripåpblekan. Maseha hayi i kandidåtu malålago. Anggen mali’e’ i dos gi gipot osino gi gima biha-hu, buente múmumu i dos, sa’ i yo-ña gayu mas maolek ki i otro.
Buente parehu este para i otro familia osino i meñe’lu palao’an osino i biha siha. Lao anggen makpo’ i ha’ånen bota, kulang matto tatte i guinaiyan familia yan todu maolek.
Hu hahasso’ pago na gof dikike’ i sengsong Inalahan gi tiempon 1970s yan 1980s. Lao gof atdet i taotao siha ginen i tiempon ileksion. Kao balen i botan-ñiha i taotao Inalahan? Anggen patgon yu’, atdet i kutturan ileksion, kulang mas bali i botan Inalahan.
