Sigi ha’ humahånao yu’ gi este na chålan mane’eyak put åmot, tinanom siha yan i sinetbe siha. Matutuhon i nuebu na klas åmot gi UOG para i fañomakan semester. Mafafa’nå’nå’gue ha’ as Mama Lou yan si Dr. Tricia Lizama, ya inayuyuda siha as i dos åmot apprentices si Chauntae yan si CJ. Gof manfofokos ya mane’eyak ham bula na åmot tinanom siha på’go na semester.
Desde hu chuchule’ i klas, hu ripåpåra meggai na tinanom siha ni’ mafa’nå’nå’gue ham. Todu tiempo annai hu susugon i kareta, hu a’atan gi oriyå-ña i akague pat agapa’ ni’ chalan ya siña hu lili’e’ tinanom siha para åmot. Guaha åmot tinanom gi todu i lugåt. Todu siña hao manlili’e’. Sen apurao yan nina’mamagof yu’ put este sa’ kumekeilekña na hu gof tungo’ noskuantos tinanom siha ginen i lepblon åmot. Puede an hu gof tungo’ i tinanom siha, bai hu cho’gue un post put taimanu un u’usa put i hinemlo’.
Put otro na hemplo’, sesso hu kokonne’ i dos påtgon para Plåsan Asan. Ya esta manlili’e’ yu’ meggai na tinanom para åmot guihi! Tåya’ nai hu tungo’ na guaha bulalala tinanom åmot gi ayu na kånton tåsi. Hu sedi i dos påtgon na para u ma pacha ya hugåndo yan i tinanom siha. Kosa ki siña ma påyuni na maisa siha todu i tinanom.
Fihu sumasaonao i dos påtgon-hu yanggen hu rerega i amot tinanom siha gi gimån-måmi. Dumodokko’ i dos tinanom ginen i simiya siha ni’ hu resibi må’pos na sakkan gi klas. Hu deseseha na uno na ha’åni guaha un dikike’ håtdin åmot gi gimå’-hu.
Ya-hu na’saonao si Lulai yan si Makåhna an mamfakcha’cha’i yu’ tinanom pat annai manespipiha tinanom kosa ki siña mane’eyak siha didide’ adumidide’ put åmot. Hu diseseha na siña hu fa’nå’gue siha put todu este. Ya malago’ yu’ na para u ma eyak mientres hohoben ha’ siha. Siha uno na råson-hu ni’ mane’eyak yu’ put åmot ya hinemlo’. Sa’ ma na’homlo’ yu’ gi lina’lå’-hu. Todu tiempo gagaige siha gi korason-hu, ya gi minagåhet, ma giha yu’ gi este na chålan i linalå’-hu an guaha nesisidåt-hu. Malago’ yu’ na bei nå’i siha este na guinahan taotao-ta ya puede u ma agradedesi ya na’sesetbe todu i tiningo’-hu ni’ manå’nå’i. Ya buente uno na diha para u ma fa’ñå’gue i famagu’on-ñiha.
Mambonito hamyo!