Pumårañaihon si Maria ta’lo gi mamokkakkåt-ña, annai ha hasso ayu na diha annai ma fa’nu’I gui’ ni a’ok-ña para i kasamiento.
Para otro famalao’an gi familia-ña, esta manli’e’ si Maria I fihu pusision-ña I a’ok. Guaha a biahi antigon centemos Españot, oru pat similot.
Para uno na primå-ña, manmalakse i sentemos gi un sinturon para i nobia. Para un otro primå-ña, manmalakse i sentemos gi bestidå-ña kasamiento taiguihi adotno.
Lao gi halom este na kåha, entre i sentemos, i boniton magågu, guaha un dångkolo’ yan åttetelong na alåhas. Ti meggai tiningo’-ña si Maria put alåhas pat prisisu na åcho’ yan mineråt siha.
Lao siguro gui’ na este diamånte. Lao pine’lo-ña na diamånte kalang lamlamlam. Ti didok åttelong taiguini.
Ilek-ña i nanan Jose, na gagaige este na tresoru gi halom i familian-ñiha desde i tiempon anai fine’nina manhålom I Españot.
Chumålek gui’ didide’ annai ha estoriåyi si Maria, lao guaha sinientete-ña i palao’an na guaha minagahet gi este na estoria. Ti siguro gui’ håfa, lao tumachu i pilu-ña annai ha hungok i estoria.
I manmofo’na gi familia, ma ayuda i mamåle’ Españot, ya ma ayuda lokkue’ I sindalon-ñiha gi i gera kontra i ti manosgon na Chamoru.
Uno na sainan-ñiha ha risibi este na rigålu ginen i ma’gas påle’. Ha nå’i I familia sa’ mamfi’et yan mamdibotu nu i nuebu na rilihon. Meggai otro na Chamoru ma tattiyi i hemplon i mansantanas, i manganiti. Lao I familian Jose, åhe’, ma li’e’ ensigidas i mina’lak yan minagahet ginen as Yu’os. Ma difende i nuebu na guma’Yu’os.
Todu i famalao’an gi familia-ta, ilek-ña i nana, debi di u ma usa este na alåhas. Komo na ha aksepta lokkue’ taiguihi i mañainan-ñiha, i podet i gima’Yu’os yan si Yu’os gi lina’la’-ña yan kasamienton-ñiha.
“Despues di umasagua hamyo, bai hu nå’I hao ni’ este, ya debi di un usa gi primet na puengen-miyu.”
