Manmamomokkat si Maria yan i familia-ña para i gima’Yu’os. På’go i Ha’ånen i Kasamiento-ña, lao esta malingu i minagof-ña.
Todu manguenguentos gi oriyå-ña si Maria. Manguenguentos put guiya ya kinentutusi nu siha, lao tåya’ hiningongok-ña.
Malingu si Maria gi chumubabasko na hinasso-ña siha. Ya gagaige ha’ i sinangån-ña i ga’chong-ña ni’ taotaomo’na. Ha tago’ gui’ na ti debi di u hålom gi gima’Yu’os på’go. Lao ayugue nai i nobiu-ña, ya esta ha nanangga gui’.
Gof mahålang gui’ para i matå-ña ya sen apurao si Maria na estague dipotsi i primet na diha para i nuebu na lina’la’-ñiha i dos.
Todu i familia-ña ma sapopotte este na inasagua. Hunggan guaha na biahi ma kasse’ i nobiu, lao pumåra. Annai umasodda’ i dos familia, yan umanå’i pugua’, I nanan Maria ha mentioña na matungo’ si Jose na bula guinaiyå-ña, ya todu i famalao’an ma tungo’ este. Buente ti nahong i hagå-ña para todu ayu na guinaiya. Un låhi taiguihi buente debi di u konsigi umaligao esta ki ha sodda’ i dinanche na palao’an.
Annok na nina’bubu si Jose nu ayu, lao nina’suheta gui’ as nanå-ña. Ti ya-ña si Jose este na hapladoria, ko’lo’lo’ña anggen guaha chumåchanda i guinaiyå-ña para si Maria. Lao si nanå-ña ha tungo’ na este i kostumbren i taotao, ma chachagi i familia, pi’ot i lahi.
Ilek-ña i nanan Jose, na tåya’ tiningo’-ña put i hinasson pat i sinangan otro taotao, ti taiguihi na klasen taotao gui’. Lao ha tungo’ i lahi-ña, ha tungo’ i sensen-ña ya gof annonok na guaha taigue giya guiya. Chagogo’ i inatån-ña gi ha’åni.
I nanan Jose ha pacha i pecho’ i lahi-ña ya ha sangåni i familian Maria, “taigue i korason-ña. Gaige guini gi halom este na kuatto, siempre esta gaige gi as Maria, i hagå-mu. Buente si Jose ha na’i’guan gui’ pat hagas nina’i as Yu’os, lao enaogue gui’, pues estague hit.”
Annai i familian Maria ma hungok este na fitmeme i sinienten Jose, ma deklåra na ma gutos i finihu ya ma disidi i fecha para i kasamienton i dos.
Todu gi i dos familia ma aksesepta ya ma silelebra este na kasamiento, håfa i tiningo’-ña i taotaomo’na na ti malago’ gui’.
