Sumen åpmam ta’lo desde manuge’ yu’. Eståba mampos tinane’ yu’ yan i klas åmot ya i hinanao i familiå-ku gi sanlagu ma’posña na mes.
Maneyak yu’ meggai este na uttimo’ na klas. Sa’ mamfokos i klas put bula tinanom åmot ya i sinetben-ñiha.
Guaha chansa para hami manayuda yan si Mama Lou ya iyo-ña apprentices para workshops pat fina’nu’i siha. Ya guaha fina’nu’i para i manhoben ni’ manayuda yu’. In fa’nå’gue i famagu’on gi eskuelan elementårio put i differentes na tinanom åmot siha ya tamainu u ma usa.
Guaha otro na finanu’i gi Unibetsidåt Guåhan para todu i mamkolelehu. Si Mama Lou mannå’i simiya siha ni’ u ma dokko’ tinanom put Åmot Pasmun Sinagu. Estague’ i åmot yanggen mañom hao.
Manhanao ham yan i estudiånte siha ginen UOG para Litekyan put un pinekkat ni’ para ta fanripåra meggai tinanom åmot guihi. Sen bonito i lugåt. Siña un siente i aniti siha, ayu i manmofo’na. Estague’ un gof maprutehi na tano’. Ya ti siña en bisita este pinekkat sin un giha pat ranger ginen i Wildlife Refuge. Pribidu put todu i taotao.
Gi finakpo’ i klas, guaha fina’nu’i para i publiku. Manmadibidi ham gi dos na grupu ni’ debi di in fa’nu’i i taotao i finå’tinas-måmi put dos differentes na åmot. Para i grupun-måmi mamå’tinas ham Åmot Mahulat Påchot (åmot ni’ en isa para “sore throat”). Este na åmot ma’u’usa i pitot, i lisong yan i lemmok. Ya i otro grupu, Åmot Cholesterol i finå’tinas-ñiha.
Malago’ si Mama Lou na guaha kineprenden-måmi put i amot ya siña in apåpåtte i tiningon-måmi para otro taotao. Kosa ki siña in konsigi mo’na i amot para i nuebu na henerasion.
