(Every week or so the Guam Museum will be sharing something in the CHamoru language about our history, culture and folklore. This week we’ll share some reflections inspired by Tan Maria, a techa, sharing her experiences about the busy nobena schedule each December.)
Gi duranten i tiempon Påsgua Nochebuena, meggai na klasen nobena hu tutucha.
Bokka i belao-ña un techa gi este na tiempo gi sakkan.
Fine’nina, gigon ha’ humålom i Disiembre na mes, duru hu tutuhon manecha ni’ nubenan Santa Maria gi gima’-måmi yan gi gima’ dos na bisinu-hu.
Gof na’magof magåhet sa’ dångkolo’ entension-hu para si Santa Maria.
Un biahi anai ti siña mamokkat i hagå-hu ni’ siette åños ya ni uno na mediku siña umayuda pat umåmte gui’, hu prometi i Santos na anggen ha na’homlo’ i hagå-hu bai hu tuchåyi gui’ nobena kada Måyu yan Disiembre.
Pues magåhet na desde 1981, hu taitatåyi si Santa Maria kada måtto enao na dos meses sa’ hunggan ha na’homlo’ i hagå-hu as Josefina.
Gigon manmamakpo’ i nobenan Santa Maria guaha na esta diesis ais na nobenan Niñu hu tutucha para u fanmåkpo’ gi Krimas, gi åño nuebu, pat gi Tres Reyes.
Ya ti este ha’ gi sengsong-ta ha’ na kontodu gi otro lugåt, otro songsong lokkue’.
Todu i tiempo yayafai yu’.
Ya-hu gumimeni limonada kada diha ni’ puten aga’gå-hu.
Lao tåya’ guaha, bai hu sungon ha’ sa’ para i Niñu.
Dipotsi agon nubenan famagu’on este i Nubenan Niñu ya gof magogof yu’ yanggen maseha månu na manucha yu’ nubena bulala famagu’on manubebena yan mangånganta.
Espesiåt mångnge’ manmahungok ma kånta “Si Jose yan si Maria” pat “Fanmåtto Manhengge.”
Guaha na biahi nina’kåti yu’ nai hu hungok famagu’on kumåkanta este na dos.
