(Every week or so the Guam Museum will be sharing something in the CHamoru language about our history, culture and folklore. This week we’ll share part of the history of how Guam became embroiled in the global conflict that was World War II)
Manmaolek i lina’la’ i taotao-ta siha åntes di i Tiempon Chapones, ya a’annok i minaolek i familia-ta siha.
Mikinalamten i ikonumihå-ta, nu i ta susteni na maisa, ya sigi ha’ lumalameggai i tinaotao siha.
Iya Sumai yan Hagåtña i sentron i che’cho’ siha gi i isla.
Todu este para u matulaika yan i finatton i gera.
Ni’ ti meggaigai na sinangan, ha na’fanhånao i Marinu i taotao-ña yan i familian-ña gi i Oktubre 1941 giya Guåhan, ya masotta ha’ i CHamoru siha para u ma difenden maisa siha yan noskuantos grånu na gurupon militåt Amerikånu nu i manetehnan.
Achokka’ guaha familia siha manmasangåni put i piniligru ya ma tutuhon prumipåra siha siankåsu u guaha gera, i meggaiña ti sumospecha na u saonao gi i gera ni’ ti fina’tinås-ta.
