Fanhongge gi Suruhana

Kalan guaha kalamten yan mas meggai na taotao tano’ man interesi’ matungo yan mane’yak pot i åmot Suruhano yan Suruhana.  Na’ magof este na direcho para ta tungo’ taimanu i åmot na’homlo’ yanggen inamten i Suruhano pot i Suruhanu. 

Malago yu’ sumangani hamyu nu i eksperensia-ku annai ma’amte yu’ nu i Suruhana gi sakkan diesinuebi-setenti-nuebe (1979).  

Despues di mafañagu i lahi-hu gi sakkan diesinuebi-setenti-sais (1976) giya Guahan, kada yu’ ma’lak sanhiyon guma,  yaggen sen maipe yan ma’lak i atdao guihi na ha’åni, hu tutuhon masa’pet.  I masa’pet-hu tumutuhon annai makakaka todu I táhtaotao-hu, ya pues duru malakngos kalan stapoyidos desde i aga’gga’-hu papa’ para i patas-hu.  Guaha na biahi lokkue’ na kalan puti yan maipepe i táhtaotao-hu. An puengi, ti siña yu’ maigo’.  

Lao taya’ bidå-hu para bai espehia hafa na åmot siña muna’ suha i chetnot-hu.  

Ti atman na tiempo, en dingu Guahan para bai sagåyi yan fanmacho’cho’ giya San Francisco, CA.  Ti hu padesi este na chetnot giya San Francisco sai meggaiña tiempo manengheng gi guatu.  

Pues, gi sakkan diesinuebi-setenti-nuebe (1979), man hånao-ham tatte manbakasion giya Guahan. 

Gi finéne’na na dia, manman yu’ annai hu ripara yan hu siente tumutuhon ma’sa’pet.  Kalan atdedet. 

Malågu yu’ para as Nana-hu Biha sai hinnaso-ku na siña a’ cho’gue maseha hafa siña para bumasta i padesi-hu.   Ha sangåni yu’ si Nana-hu Biha na nisisita na bai bisita i  Suruhana, ya siña ha’ a’ konne’ yu’.  Lao, hu sangani si Nana na ti manhongge yu’ yan ma’a’ñao yu’, pues ti hu espiha I Suruhana.  

Gi mina tres dias gaige yu’ Guahan, måtto manbista i kumaire-ku ya ali’e’ na sen chinatsaga yu’.  Ha attan yu’ ya un gotpe ha’ konne’ yu’ para i tiha-ña Suruhana, si Maria Tuncap, taotao Maina.

Annai ha attan yu’ si Tan Maria ya kumuentos ham, ha sangani yu’ na este na pinadesi ma’aggan “chetnot bosbos yan chetnot mapi” sai ti malaknos todu i sepblan i placenta annai mañagu yu’. Ha sangan na guaha na biahi e’yu siha na famalao’an nu i manmanagon naturåt, ma susedi esti na pinadesi.  

Dimasiáo atdet I padesi-hu yan sen makaka yan puti I táhtaotao-hu, pues hu faisen si Tan Maria kao siña ha ayuda yu’.  En tutuhon kumentos pot hafa taimanu si Tan Maria para ha amte yu’.

Ha konne’ yu’ halom gi ofisina-ña.   

Gi kuatton manamte kalan kusinan sanhiyong lao ma luga todo yan gai bentana. Estaba i foggon hayu gi unbanda annai ha na’ lolokklok un dångkolo na la’uyan åmot cha, yan gi otro na banda ha na’mamaipe’ i lañan niyok gi dikiki na la’uyan.  Guaha lokkue’ un lamasa annai mapega meggai na tinanom yan hagon åmot.

A’na’ asson yu’ gi lamasan manamte ya ha na’i yu’ sa’banas para bai tiampe i táhtaotao-hu. 

Finéne’na ha na’gimen yu’ un dångkolon basun åmot cha.  Hu egga’ si tan Maria muna’ maipe i lañan niyok ya ha palai gi kanai-ña. Pues ha tutuhon ma lasa i estómagu-hu yan i tátalo’-hu.  Hu hassao na annai malalasa yu’, nina maigu yu’ didide. 

Annai kalan naba’ i táhtaotao-hu, a fa’nu’i yu’ nu i finatinas-ña åmot hilengga. Ha na halom i hilengga giya guahu.  Pues ha tutuhon ta’lo mu lasa yu’ nu i maipe na lañan niyok.  Annai maloffan kinse minutus,  ilék-ña esta monhayan I cho’cho’-ña.  

Ha na’i yu’ un galón åmot cha yan un tarun lañan niyok para bai chule’ para I guma’-mame.  Ha sangani yu’ hafa para bai chogu esta måtto yu’ tati gi mina siete na dias.  Ha insisti si Tan Maria na debi de hu sen osgon I tinågo’-ña yanggen malago’ yu’ humomlo’.  Siempre puti i siente-ku para tres dias ya téneki la sesso hu falaggue I kommon.  Lao ti hu hassao hafa na tinanom ha u’sa si Tan Maria para i åmot-hu.

Sen magahet si Tan Maria!  Gi minatres dias desde uma’li’e ham, hu tutuhon sumiente na maolekña i siente-ku.  Gi mina siete na ha’ani, hu ma’li’e ham talo’ yan si Tan Maria.  A amte yu’ talo’ nu i cha yan manlasa.  U malie ham talo’ un biahi antes de tuma’lo yu’ tatte para San Francisco. 

Annai para bai apåse si Tan Maria, ti malago’ ha chule’ i salåpe’-hu sa ilek-ña na familia yu’ yan sen umatungo’ yan si Nana-hu biha.   Sen fotmat na ti hu necessita umåpase gui.  Ti hutungo hafa para bai chogue sa sen malago’ yu’ mu na’i si Tan Maria apås para i na’humlo’na ni guahu.  

Hu sanganni si Nanan biha pot este. Ha tago’ yu hafa taimano para bai na’ annok I agredesi-hu as Tan Maria.  Annai ma’a’amte yu’, hu repara na kalan sina ha la maolek yan guaha otro na la’uya para i nina’ lagu-ña åmot. Pues malak I tenda yu’. Hu fahåni dos na’la’uyan dångkolo ni gai tåmpe. Mamahan yu’ lokkue’ hineksa’, biskuchu, kesu, manitiya,  laten katne yan satdinas yan un boteyón binu – Morgan David.

Sen magof si Tan Maria annai hu na’i todo nu i chenchuli-hu.  Ti hu sagani na hu pega lokkue’ salåpe’ gi halom i la’uyan.  Kalan a na’ tånges yu’ sai para bai dingo gui yan i tano’-hu Guahan.

Lao guahu mas magogof sai si Tan Maria a’na’homlo’ yu’!  

 Mas impottånte, ha’ ná’ fanhongge yu’ nu i na’homlo’ i åmot.  

Desde pago na tiempo, taya na nina’i’ yu’ talo’ nu esti na kalssen chetnot.  Este na eksperensia, ha na ínteresio yu’ humespiha åmot naturadåt fine’ne’na untes di bai falak i mediko.  

Malago yu’ tumungo’ hafa taimanu i amten Suruhana pago na tiempo.  Hafa mon?

Pinenta siha gi este na estoria as Judy Flores