Estorian i Tiempon i Chapones

Hu aliligao estorian Chamorro gi i Internet para ke’tungo mås i fino’-ta. Pues un biahi hu soda este na estorian taotao siha giya NMI. Guaha 90 na estoria siha. Guaha video siha yan tinige-ñiha. Hu egga’ yan tumaitai i estoria siha yan gof ya-hu na hungok i fino’ Chamorro nu i taotao NMI. Kulang parehu na i taotao sanhaya giya Guahan.

Estague uno na estoria, i estorian i tiempon i Chapones na ha sangani si Jose Quitugua Lizama giya Saipan.

NORTHERN MARIANAS COLLEGE
ORAL HISTORY PROJECT
CNMI ARCHIVES
Date: August 30, 1991
Interviewer: Herbert S. Del Rosario
Interviewee: Jose Quitugua Lizama
Video Man: Ray D. Diaz
Transcriber: Nomi Lifoifoi Kosaka

Introduction

I was working at the small side yard just outside the back entrance to the Lizama’s home. Buenos Dias. Guaho si Herbert Del Rosario, ginen i Northern Marianas College Library. Humame yan i gachonho as Jim Elise. Pago na haane, Agusto dia trenta, mit nobiesientos nobientai uno, Bitnes. Ya sumen magof yo nu baihu introdusi i Kimeta as Mr. Jose Q. Lizama, si seniot Lizama. nu uno gi tautauta giya Marianas ni man dangkulo kontribusionna gi Communidadta, parehoha gi Communidad yan gi Guma Yuus giya San Antonio. Nu sina hafa mas na ditention, malago yo pago na baihu halom ya baihu faisen si Mr. Lizama, ni este siha na Questiona gi pot i expirensiamo gi tiempon i Japones asta pago gi tiempon Americano.

Finaisen 1:
Finenina, para i record, sina un sangane yo ni naanmo no?

Oppe 1:
Si Jose Quitugua Lizama.

Finaisen 2:
Okay si Yuus Maase nu Mr. Lizama. nu gai-an nai mafaniago hau?

Oppe 2:
Mit nuebe sientos benti dos (1922, 25 of Junio) benti sinko de Junio.

Finaisen 3:
Okay si Yuus Maase talo. Nu mafaniago hau ha guine giya Saipan?

Oppe 3:
Saipan.

Finaisen 4:
Okay. I finenina na sueto ni parata pacha este i bandan Education, Gi tiempon i Japones antes de i Gera. I kinemprendemmo yan gi hinasommo nu, hafa mohan i Chapanes hanae opportunidad i tautauta ni man Chamorro yan i Carolinias para ufan eskuela gi tiempon i Japones?

Oppe 4:
I eskuela ha baba. Lau i estudio limitido.

Finaisen 5:
Okay. Nu mano este siha na eskuela man gaige giya Saipan na village?

Oppe 5:
Nu i eskuelan Chamorro, i famaguon Chamorro, un lugatha nai gumaige, este hulo pago i ma-uusa komo Chinatown.

Finaisen 6:
Okay si Yuus Maase. Ya Mr. Lizama, hafa mas tatkilo na clasi i tautauta osino i Chapanes ha ofreresi i eskuela siha para i tautauta siha?

Oppe 6:
I Chapanes na gobietnamento taya hanae i tautau tano, parehoha Chamorro yan Carolinias. En-nauha i sinko grado. Yangin gumuaha adelantonna, desde uno asta i tres, pues mahatsa hulo kuatro yan sinko. Lau sinkoha.

Finaisen 7:
Sinkoha no?

Oppe 7:
Sinko grado ha.

Finaisen 8:
Okay si Yuus Maase. Nu guaha un hatsu gi man tautauta nu ma atbansa eskuelan.niha mas ke i sinko grado?

Oppe 8:
Hungan. I uno esta matai. I hagas na arkanden Saipan, gi uttimo arkatden Saipan, gi antes de u halom i Commonwealth, Si Vicente D. Sablan. Ha chule enau na estudio gi sanhiyong, despues de humuyong gi eskuela yan si Juan Blanco, humuyong gi tres, hu manau para Japon, ya maniule mas estudio giya Japon.

Finaisen 9:
Okay si Yuus Maase nu pot enau. Nu yangin ti lache yo gi tiempon Chapanes, nu man dadanna i tautauta Chamorro yan i Carolinians yan i Japones gi…estudianten Chapanes gi halom eskuela?

Oppe 9:
Ahe. sumuha i Chamorros yan i Carolinas gi halom un eskuelaha. Dumadanniag i Japones ottro banda.

Finaisen 10:
Nu sina un kompara i education gi tiempon niha i Chapanes, gi tempon Chapanes giya Saipan yan pago? Nu gi pago yan gi tiempon American, hafa na diferensiao?

Oppe 10:
I diferensia dididi dangkulo na diferensia. Sa i famaguon pagyo na disiplina man mananae.

Finaisen 11:
Antes gi tiempon Chapanes?

Oppe 11:
Gi tiempon Chapanes antes. En-nagui balinia i Chapanes sa harebaha tododo i guaha na timauleg yangin para u kahulo gi edadna.

Finaisen 12:
Si Yuus Maase. Pago gi bandan i gobietnamento nu, taimano gi tiempon Chapanes nu, guaha tautauta, guaha gobietnon osino nu tautauta man man tietiene possision gi bandan gobitnamento gi tiempon Chapanes?

Oppe 12:
A..i kinemprendeko, i halom i polisiaha na patte. Sa guaha uno esta matai, si Juan Castro, Juan Bulu ilegniniha gi tiempon Japones. Gaigi enau pago gi taigui i serrif, gi pago na tiempo.

Finaisen 13:
Ya gi halom i man Chamorro, guaha siha tautauta manman-mantiene possision, taiguihe komo atkarde pago na tiempo?

Oppe 13:
Hungan. Tinanchu ni gobietnon Japon, para u atkarde. Lau taya botu. Tinanchoha.

Finaisen 14:
Okay. Un hatsuha haye na tautau este?

Oppe 14:
Hungan. I si Bidad Muna Camacho. Este despues de mumatai si Tun Bidad, ma-tanchu si difuntu Tun Juan Botdig. Si Tun Juan Botdig, humahnanauha asta ke matulaika i mobienton i gobitno, guine gi despues de magpo i Gera.

Finaisen 15:
Okay si Yuus Maase Mr. Lizama. Nu gi tiempon i Chapanes antes de i Gera, Hafa chechochomo?

Oppe 15:
Eskuelante yo.

Finaisen 16:
Eskuelante hau? Oh nu guaha un hatsu siha pago na tiempo giya Saipan, an puenge, osino ayo i entre simana, ya an weekend, guaha siha bola, basketball, yan todo klasen huego nai. Hafa gi tiempon Chapanes i tautauta ni Chamorro siha, nu huegon niniha?

Oppe 16:
Base Ballha, Base Ballha enagui mana superiot, na huego kada Damengo, yangin ma baba i tiempon season.

Finaisen 17:
Season no? Okay, si Yuus Maase. Ya guine gi bandan Hospitat, nu mauleg i setbisio, yan nu man ma…taiguine pago na tiempo ni angin humanau hau para i hospitat nai. Man-apapase hau. Hafa na diferensiao yan i tiempon Chapanes?

Oppe 17:
A…i tiempon Chapanes, a..mana-papasiha i malango. Lau dikikiha na kantida. Ma-apapasiha dididi.

Finaisen 18:
Si Yuus Maase. Nu guine gi bandan Guma Yuus, komo hago uno gi man active nai, na man man ayuyuda kada Damengo, nu hulilie hau, yan buenti kada puenge gi Guma Yuus San Antonio nai, dumadandan para i Guma Yuus. Nu gi tiempon Chapanes, nu i tautauta nu manmanae ni podet man manae podet ni Chapanes para ufan malag i Guma Yuus, nu taiguine an Damengo pat hafa na espieciat na nu, bandan Religionta siha na…

Oppe 18:
Ti hachomma i gobietnon Chapanes, gi Religion. Mano gui guato. Hungan, Todo Chamorro yan Carolinas, atbetto na ufan hanau para i Guma Yuus. Taya chinemma para i Guma Yuus, taya chinemma gi Guma Yuus ni Chapanes. Asta i mit nobiesientos trentai sinko (1935) despues. Yangin ti lache yo, hatutuhon i Chapanes muna para i Guma Yuus desde mit nobiesientos kuarentai tres na sakan (1943) kuarentai tres. En-nagui nai hadulalag tododo i Chamorro, yan tododo i Religion ha huchom anai este ha …para u tutuhon Gumera.

Finaisen 19:
Yan i Americano?

Oppe 19:
Yan i Americano.

Finaisen 20:
Yangin ti lache yo, guaha tautauta nu ni ayo i man ma-pongle nai. Yan i mamale siha unhatsuha este na sinisede?

Oppe 20:
A…ti man maponle. Na man madulalag. Man madulalag gi Conbiento ya ha tattiye i Chamorro mano nai man gaige. Sa anai man ma dulalag i tautau tano gi halom Saipan, Kon todo i Pale sumaunau ma dulalag. Sa ma-huchom i Guma Yuus. Ya man hanau yan ha-tattiye mano nai man gaigi i linahyan i tautau.

Finaisen 21:
I ottro nu guine gi bandan i Religionta nai, ni man Katoliko giya Saipan, nu… Pago na tiempo kana kada siud kana Village nai, Ta silelebra iyota Fiesta no, kada Village nai guaha iyonna Patron, ayo na Lugat. Gi tiempon Chapanes antes di Gera, nu man ma selelebra i Fiesta siha yan i…

Oppe 21:
A…antes na tiempo gi duranten i Chapanes, dosha na Guma Yuus guaha. Uno giya Garapan iyonna Patrona i Bithen Del Carmen, yan uno giya Tanapag, ni maagan Nuestra Senora Delos Remedios. En-na gui i dos. Pues i… Santa Remedios giya Tanapag, hananae Fiesta gi kada Sakan.

Finaisen 22:
Okay. Si Yuus Maase. Gipago na tiempo nai, i mas dangkulo na Industria giya Saipan, osino giya Marianas este i Turista no. Yan mayoria gi tautauta, man machochocho gi gobietno. Gi tiempon Chapanes, Hafa i mas yahululu na nu possision, sino bandan empleau para i Chamorro siha yan i Carolinias?

Oppe 22:
Sinaha baihu tufon, i asuntun i Polisia sinaha baihu tufong haye siha na tautau, man makonne para Polisia. Yangin un sede yo, baihu nae hau nu i naan niha todo. Kau un sedi yo?

Finaisen 23:
A..Mas mauleg sanganeha yo kuanto nai no?

Oppe 23:
Okay, ti sina yo baihu nae hau, nesesitaha baihu tufong sa lamegaiha.

Finaisen 24:
Lamegaiha? Pues mas mauleg, okay sagane ham?

Oppe 24:
I ya hululug na Chamorro gi Gobietnon Polisiha gi Japones. Si Juan Castro, si Buku, Si Komoi, Tun Jesus Guerrero, si Antonion Cabrera, Tian, Si Herman Guerrero, Pan, Si Josen Muna, si Joaquin Guerrero, chelun difuntu Rai, Si Ignasion Aniguat, Santos yan si Difuntu, Josen Villagomez, yan i difuntu Josen Villagomez ha talo. Si Josen Kiyu yan Si Josen Lafet, yan si Josen Tenorio i chetlun este as Doi, Joaquin Tenorio na Jose. Yan uno na Antonio Cabrera talo, pumolisia este, chetlun este as Mrs. Maria Seman. En-nagui siha na Chamorro, yan uttimo si a… Manuel Sablan, Deda.

Finaisen 25:
Oh si Tun Manuel no? Okay si Yuus Maase nu ni enau na banda. Maila pago ya ta halom gi bandan i Geran Dos, anai mato Saipan. Nu kuantos anos hau anai gera Saipan?

Oppe 25:
Esta i edad ho esta para biente dos anos. Pues anai matutuhon i Gera benti un ano yan dies mesis.

Finaisen 26:
Dies mesis no. Magahet na mamaulegha inasommo. I ottro nu mano nai estaba hau anai Gera?

Oppe 26:
Okay, estaba yo gui hi tatte, ayo i mafananaan Chalan Galaidi.

Finaisen 27:
I ottro Mr. Lizama nu, mano nai man atog hamyo yan i familiammo durante i Gera?

Oppe 27:
Tododo, ayoha gaige tododo. Halom Chalan Galaidi.

Finaisen 28:
Nu hafa mas un hatsu gi…na momenta nai, anai gera Saipan? Guaha un momenta un hatsu ni ayi i gef makat malefa hau?

Oppe 28:
I bala hungan. I masongen i tano, gi Junio tresse, o Junio onse mit nuebe sientos kuarentai kuatro. Despues humalom i batkon aire ea talo i tropasion batkon Americano gi dia trese. Despues man halom i sindaluna gi dia kinse de Junio. Ayo gui nai ha-tutuhon todo yumamag todo i tano.

Finaisen 29:
Okay si Yuus Maase. Nu chumetnudan hau gi Gera? osino guaha gi manielumo nu matai pot i resultan i GERA?

Oppe 29:
Grasias adios ti chetnudan yo yan i man gachon ho siha yan i manieluho taya chetnudan.

Finaisen 30:
Ya taimano i tautauta ayo siha i man Chamorro, ayo i Chamorruta nai yan i Carolinias ni man matai nu, Hafa taimano na man mahafot enau siha, taimano man ma-hafot niha?

Oppe 30:
Man ma i…i..mi-tautau yangin trabia ti hihihot i,…i..enemigon i Chapanes, pues guaha nai mahafotha guihe na lugat gi, anai man gaige. Pues yangin taya esta lugat, taya tiempo anai para uma…um asiste i tatautau i matai, ma poloha guihe ya man hanau.

Finaisen 31:
Ya nu Mr. Lizama, nu anai magpo i Gera, mano nai man mapolo i Chamorro siha?

Oppe 31:
I finenina todo i man makokone mam ma kokonet tate guine gi paten i denni. Unos kuantos oras. Despues man ma tranferia papa guine gi ya Susupi. Este gui i finenina na Campon Chamorro giya Sususpi.

Finaisen 37:
Ayo i Camp Sususpi no? Sina un sagane yo dididi, taimano i linala gi halom i Camp Susupi, kumeke ilegko nu man machochocho i tautauta gi halom i Camp?

Oppe 37:
A…taya machochocho gi halom i Campo, ha baba i gobietnon i Militat gi kuarentai kuatroha na sakan. Hakonneha ayo siha i man gai edad ni sina man machocho, gi duranten i Militat na tiempo. Trabia guenau gagaigiha i Militat. Ya sigiha de gumera. Lau estaha kasi Pas, gi kuaren…ahe trabia despensa yo. Ti papas gi kuarentai kuatro. Todo ayo siha i…i man machochocho gaigiha na tinatitiyeha ni polisman i Militat.

Finaisen 38:
O…okay ya, taimano tugo miyo ni Chamorro na magpog esta i Gera?

Oppe 38:
A…madeclara na magpo i Gera gi kinsi de Agustu, gi mit nobie sientos kuarentai sinko.

Finaisen 39:
Sinko no? Si Yuus Maase. Este gui na programa nu Mr. Lizama, taimanoha i husangane hau antes de utatutuhon, nu ma intensiona este para ta protehe i Istorian i tanota nai, Sa gof na pinite giya Saipan nu, an humanau hau para masea mano, Collejio yan mano, mano na Library siha, gof makat manioda ni ayo i magahet pruductun maproduce guine gi tanota nai na estoria. Puruha tautau hiyong tumutugi i estoria, ya ti gef dinanche nai…

Oppe 39:
Para infotmasion-mo-ha, Mr. Del Rosario, nu a i…alakuenta ti sen megai na tautau nu despues de i Geraha, anai magpo i gera [taya na] tautauta guine gi halom i Saipan, na en-nauha i yangin ti lache yo, mit kuatro sientos. Despues de monhayan magpo i Gera, man ma muebe tododo i Chamorro ni man gaige gi ottro Islan pot i ehemplo, Yap, Palau, Chuuk, Ponape yan tododo. I Sanhaya yan San Lago, na Carolinias, Man chinile todo, man kinenne todo magi ni Americano
ya para umanafan dannia, Pues ayo guina gumuaha dos mit na Chamorro yan Carolinian dumanniag. Gi halom Saipan.

Finaisen 40:
A..yake esta i tiempo kulan tatfena, Antes de tahuchom este i programata, guaha siha malagomo para un sangan para i man mamamaila siha na tautauta guine giya Marianas?

Oppe 40:
Hungan nu…Mr. Del Rosario. Hu-aatan pago na ora, I mubimenton i tautauta siha guine, Nu estaha baihu alog na-choka, achoka uta sangane, pat utafannague, buenti ti…yangin para ayo, chuli i hagas na kostumbre, buenti ti uchule sa esta ginagagauha ni tiempo. Lau tinilaikaha i kostumbren-na, Lau potlo menos, masea ti i, debide u-tungo i linguahina. I ottro, debide utat-tiye, ayogui mas metgot giya guaho pago na ora, I disiplinan i patgon kontra guato gi saina. Sa i educasion gaige gi halom i gima. Sa i eskuela ni humanau i patgon, ahe sa taya para umafanague i patgon sigun i gaigeha subhetun i eskuela, kuentas, tinaitai, mangi, esectera, esetera, esetera. Lau i mubimenton i patgon gi hilo i linalana, gi desde ayo na edad, asta ke u-kahulo, yangin ti makorihe ni tododo i chalan i minauleg, siempre uguaha ti u tunas mona. En-nagui i kostumbren mame. Sa i gobietno yan i familian i gima, pumareho i dos. Na debide uma-disiplina i patgon gi halom i gima, yan kon-todo i eskuela, para uinayuda i Saina gi eskuela. En-nague, muna ti man disatento ham pago na kinahulo tautau. Sa ennague mas i disantentia i mas tatkilo yan mas tagalo na finanague.Finanague i tano.

Finaisen 41:
Okay si Yuus maase Mr. Lizama pot i tiempom-mo. Nu enkuenta di i Olympio T. Borja Memorial Library, gi Northern Marianas College, Ilegko talo baihu nae hau un dangkulo na si Yuus Maase pot este i infotmasion yan i estoria ni un sagane hit dididi pot i tanota nai yangin mas malago hau para un na halom guine na programa, o na estoria, nu aagan ham ha gi Collejio ya ta record talo.

Oppe 41:
Hungan.

Finaisen 42:
Okay, pues si Yuus Maase Mr. Lizama.