Estorian Guinaiya: Påtte Måno’ na Gai Hugua

Malingu todu i chathinasso-ña siha si Maria para i sepblan ha’åni.

Ha li’e’ i minagof gi todu i matan-ñiha i dos familia, ya nina’magof yu’ nu ayu lokkue’.

Esta gof taigue gi hinasso-ña i sinangån-ña i taotaomo’na put este na kasamiento. Maolelek yan mångngnge’ todu på’go.

Anai munhåyan i dos gi gima’Yu’os, manhånao todu para i fandanggo.

Mata’ta’chong I nuebu na umasagua gi uno na lamasa, ta mamfifila i taotao kosaki siña ma nå’I I dos memorias yan guinaiya.

Sigi ha’ si Maria yan si Jose kinentutusi nu este linhåyan taotao.

Guaha bisinu. Guaha parientes. Guaha estrangheru lokkue’, manespipiha nengkånno’.

Lao gi minagahet si Maria, ti ha gof ripåpara todu ni’ masusesedi gi oriyå-ña.

Mambabaila i taotao. Guaha dåndan lokkue’, ha huhungok un danderu kumåkanta “Tippi Tippi Tun Tippi Tan.” Guaha un bihu lokkue’ mandåndandan belembaotuyan.

Guaha plåton na’-ña, lao ti ha pacha trabiha.

I mås impottånte para si Maria guihi na momento na sumisiha yan si Jose.

Para noskuantos åños uma’atok i dos, ti ma na’a’annok i sinienten-ñiha. Ti siña umatoktok gi me’nan otro taotao. Ti siña ma sångan i guinaiyan-ñiha.

Lao på’go, gi me’nan todu i mangaige gi este na fandanggo, ha go’go’te i kannai-ña I asagua-ña. Ha chichiku lokkue’ i asagua-ña gi fasu-ña.

Este i minagof hagas ha nanangga ya hagas ha guguife.