“Hagå-hu, maila magof hu na måtto hao.”
Åntes di ha li’e’ i ga’chong-ña, esta siña ha hungok i bos-ña. Makililili i sonedu gi manglon hålomtåno’. Muñañagon gi hagon siha. Ha tatitiyi gui’ asta i tinituhon-ña.
Humuhuyong i sonedu ginen un dångkololo’ na trongkon nunu. Mandodokko’ i ramas desde i edda’ hulo’lo’ asta i kisamen i halomtåno’.
Ha huhungok i sinangån-ña, lao ti ha lili’e’ gui’. Ha espiha gui’ entre i meggai ramas, lao ti siña ha sodda’. Ilek-ña, “Mångge hao saina-hu? Gof bonito na ha’åni i på’go, sa’ på’go i kasamiento-hu!”
“Ai hagå-hu, gof gaige yu’ gi me’nå-mu!” Gigon masångan este, ha tutuhon kumlalamten i ramas gi sanme’nå-ña i trongko. Si Maria ha ripåra annai dumesnek entre i ramas un dångkololo’ na figura.
Ti gof annok håfa humuyong ginen i ramas, lao gof lokka’ña kinu si Maria. Ti annok i lassas-ña sa’ todu i tahtaotao-ña tinatample nu anakkoko’ yan åttelolong na gaputulu. Dos na påtte-ña ha’ i taotaomo’na uma’annok ginen i gaputulu, i agaga’ga’ga’ na matå-ña yan uno na gof dångkolo’ na kånnai, gaipapakes sen annakko’, mås kalang se’se’.
Para otro taotao buente gof na’ma’a’ñåo i pusision-ña este na taotaomo’na. Lao para si Maria esta payon gui’ nu guiya. Esta ti ha li’e’ gui’ taiguihi un birak, este un magåhet ga’chong-ña.
Desde ayu na diha nai sinedda’ nu guiya gi halomtåno’, annai umabak, fihu umakuentutusi i dos, guaha na biahi humugågando huego siha.
I na’ån-ña si Mapappa, lao hassan na si Maria ha usa i mismo na’ån-ña. Fihu ha fa’na’an gui’ “saina” pat “ga’chong-hu.”
“Sainå-hu kao mamagof hao nu Guahu på’go? Nå’i yu’ put fåbot ni bendision-mu.” Ilek-ña si Maria nu i taotaomo’na.
Tåya’ ineppe’-ña i taotaomo’na para noskuantos råtu. Lao annai put fin kumuentos ha faisen si Maria este,
“Kao un hasso na åmko’ña hu kinu i finatton i manggilagu, i chathinenggen-ñiha yan i gima’ i manganiti?” Gilågu un antigun na palåbra, ni’ i Chamoron åntes ma u’usa para i Españot yan otro taotao sanhiyong.
“Hunggan saina åmko’ña hao kinu siha.”
“Ya un anggongokko hu sa’ ini magåhet i tano’-ta?”
“Hunggan saina, håfa un kekesangåni yu’?”
“Cha’-mu humanaonaogue i gipot umakkammo’ på’go. Cha’-mu.”
Nina’mahngang si Maria nu este. Cha’-ña humåhanao para i mismo kasamiento-ña?
“Sainå-hu!” Umessalao gui’, “Sa’ håfa?”
