Si Siñot Maga’låhi as Ford Quint Elvidge fine’nina umestablisa este na plåsa gi 1953-1956. Guaha åcho’ na latte ni’ manmatransferi ni’ militåt ginen i propiu na lugåt-ñiha giya Meppo para Hagåtña, annai manmahåtsa i sagan militåt guihi. Mandinestrosa meggai na latte yan otro kosas i manantigu na Chamoru siha nu i kinahat i militåt despues gi Geran Dos (Tiempon Chapones).
Siña ta sodda’ i mesngon na åcho’ latte gi kånton tåsi na lugat yan kånton såddok na kanåda. Este i latte i mas annok yan testigon i kotturan Chamoru yan i Islas Marianas.
Kada latte guaha dos na åcho’, i sampapa’ na åcho’ ma pega gi hilo’ odda’ komo i haligi, yan i sanhilo’ na åcho’ i tasa. Ma na’fila i latte komo puru lucha ni’ kinonsiste tres asta siette kada lucha. Mandifirentes mineddong desde menos tres pie asta trese na pie, ni’ gaige gi Gima’ Tåga’ giya Tinian.
Ma kåhat i fine’nina na latte siha nu i Chamoru siha gi tiempon 1100 asta 1700 despues di finatai Jesukristo. Ma usa i acho’ latte komo fondasion etmas impottånte na estroktura gi sengsong Chamoru ya siña un sodda’ prinsipåt giya Guåhan, Luta, Tinian, Saipan. Malingu este na kostrumbre annai ha lachai gumånye i Españot i isla gi siklo 17.
Ma rinombra i plåsa gi 2003 para u ma onra si Siñot Senådot as Angel Leon Guerreo Santos, un takgahlo’ na bos para i direchon Chamoru yan i gurupu Nasion Chamoru. Mafañågu si Senådot Santos gi 1959 ya matai gi año 2003 anai kuarentai kuatro sakkån-ña. Komo setbienten publiko yan gehilo’ Chamoru, sesso ha fattoigue ini na fansagåyan para inina yan giniha put i kinalamten i Chamoru komo taotao.
Gi uno pinagåt-ña, ilek-ña si Anghet, “Ti siña hit manmatkilu yanggen manmaså’pet osino manmafa’gå’ga’ hit. Debi di ta fanohge yan ta ayek i minalago’-ta. Tåya’ tiempo para diskuidu. Guahan a ta fanbåsnak. Guahan a ta fanlachi gi chinagi-ta. Gi kada kinahulo’, guaha u fofo’na, guaha u tåtatte. Yanggen tåya’ kinahulo’ gaikonsiensa, minesngon yan finehman para u na’dinanche i linachi i fina’pos siha, pues siempre ha’ i manmamaila na henerason para u sungon i parehu na taihustisia yan fina’ga’ga’.”
