I matuna na butto ni’ gaige gi talulo’ gi halom i Katridåt Basilikan Hagatna giya Guam, guiya si Santa Marian Kamalen, patronan Guam yan i Islas Marianas. I idåt-ña yan i ginen månu magi este na butto ti ma tutungo’ asta på’go; lao bula estoria masåsangan put este. Guiya este i mas åmko’ na kosas rilihon gi gima’Yu’os Guam ni’ såfo’ ginen todu klåsen ira: gera, guåfi, påkyo, linao kontdou sinakke. Durånten i Mina’dos Gera manå’na’ yan ma gef guatdiha i butto ni mandebotu.
Sigun i dukumento siha, este na butto ma ritoka, me penta meggai biahi. Ma ritoka tres biahi giya Filipinas gi entalo’ i 1894 yan 1930 na såkkan. Si Pale’ Marcian pumenta gi 1963, 1968 yan 1971. Si Mark Dell’isola rumitoka gi 1983 yan gi 1992, guiya muna’na’lo tåtte gi urihinåt na makulot-ña i butto: ri’at na asut gi hilo’ kulot di rosa yan ma adotna ni’ oru yan plåta. Ha sodda’ este na kulot-ña annai ha pasiensåyi lumåssas i pentura yan pinatche siha ni’ kada biahi ha balutan i fumo’naigue na pininenta ya måtto gi mas yahalulom gi fi’on i hayu propiu, kåsi tres sientos años na pinent yan rinitoka. I kulot-ña på’go si Santa Maria Kamalen guiya i urihinåt na kulot-ña annai på’go måtto mågi gi islan Guam.
Unu gi mås fåmta na estoria ayu i masodda’-ña mama’ya hålom Guam giya Malesso’. Sa’ put “molava” i hayu-ña ni’ ti siña ma’ya’, kulan milagro este mismo. Otro na estoria masåsangan ayu i peskadot ni’ tumalålaya ya ha li’e’ dos na malak kåndet gi tasi ya hinasso-ña na ha mamåtka i ginaigen i panglao, ha dåggao i talayå-ña ya ha tåmpe i butto. Todu estoria sumångan na ma chule’ i butto ginen i tasi giya Malesso’ ya ma entrega guatu as påle’ ni’ umentrega guatu gi Maga’låhen Españot, maseha tåya’ dukumento para u preba este, i fecha anai masusedi ni’ mana’in i Katredat despues ginen i Maga’låhi.
