Si Maga’låhi Apuro un må’gas tiempon i manansiånu giya Litekyan. Lumå’la’ gui’ gi i mismo tiempo anai esta i taotao sanhiyong ma sagåyi i tano’-ta, ya manmahåhatsa guma’Yu’os gi halom i sengsong siha.
Iya Litekyan un gof dångkolo’ yan un gof ansiånu na songsong gi tano’-ta yan gi hestoria-ta. I Españot ma nota na mås ki Maga’låhi, si Apuro un fafa’na’gue gi halom i tiguang-ña. Ha fa’nå’gue i famagu’on giya Litekyan put i manmaloffan na tiempo siha, put i hestorian-ñiha. Ha fa’nå’gue siha taimanu siña manmannge’ gi hinasson-ñiha po’ema yan kånta, ni’ sen annakko’ yan tåhdong. Mafa’na’an este na tiningo’ “måri” pat “måli.”
I Españot guihi na tiempo, ti meggai tinige’-ñiha put i kotturan yan i minenhalom-ñiha i manmofo’na na taotao-ta. Lao put este na påtte anai ma diskuti yan i mentiona si Maga’låhi Apuro yan i bidadå-ña, ma na’annok, maseha didide’, i strukturan i tinaotao-ta guihi na tiempo. Para kada songsong guaha meggai na fafa’na’gue taiguihi si Maga’låhi Apuro, ya ma fa’nå’na’gue i famagu’on, subrinu, subrinan-ñiha ni’ tiningo’ put åntes, put i familia tåtatte gi tiempo esta ki i tiempon Fu’una yan Puntan hun. Ma pripåra siha para i inadaggao yan i inayotte ni’ sesso masusesedi gi halom i dinanña’ yan gupot siha guihi na tiempo.
