Åntes na tiempo gi iya Hagåtña, guaha un sotterita ni’ gof bunita ya todu ha’ gumuaiya. Malago’ si nanå’-ña yan tatå-ña na siha u inayeki un rikon tåotao para asaguå-ña.
Lini’e’ i sotterita ni’ un sendålon Españot ya malago’ na u inasagua. Ha ufresi i saina-ña meggai na salåppe’. Sigi kumåti i sotterita annai ma sangåni na ayu na tåotao para asagua-ña.
Duru sumospiros i sotterita. Tåya mas guinaiyå-ña i lahen Chamoru ni’ sumåsaga gi sengsong. Sinangåni as tatå-ña para u maleffa ni’ lahen Chamoru sa’ popble. Tinago’ as nanå-ña na u fanosge sa’ agupa’ ha’ para u asagua. Esta ma disidi na para u asagua yan i sendålon Españot.
Annai mumaigo’ i dos saina, malågu i sotterita yan i guinaiya-ña para u attok gi liyang gi ya Tomhom.
Pumåra i dos un råtu gi halomtåno’ para deskånsa sa’ mampos yayas. Ginen i chagogo’ ma hungok i essalåo-ñiñiha i sendålon Españot, “Espiha kåo gaige i dos guihi guatu!”
Malågu chaddek i dos lao ai sa’ måtto gi paderon. Umatoktok i dos.
Ti malago’ i dos umasotta. Ma godde i anåkko’ gapotulon-ñiha pues umañangon i dos, “Hu guaiya hao.” Tuma’yok påpa’ gi taddong hånom.
Annai manmåtto i sendålo gi kantit ya ma atan påpa’ i hanom ma li’e’ i figuran dos tåotao na uma’atoktok gi taddong tåsi.
Meggai sumåsangan na guaha na ma hungok buruku gi papa’ paderon lao siña ha’ lokkue’ ginen i napu kontra i acho’.
