Må’pos na simåna sumaonao ham yan si Lulai gi hatdin åmot para bei in tånom mås tinanom åmot siha ya trongko siha.
Gof ya-ña si Lulai humahånao para i sanhiyong. Mañodda’ gui’ ramas ensigides. Kalang un hobenña ya dikike’ña na klasen Gandalf gui’.
Gi minagåhet, tåya’ biddå-ña si Lulai, fuera di chumålek, malågu todu gi oriyå-ña i hatdin, ya chumocho cookies. Lao ha nå’i yu’ “moral support” guaha na biahi. Ya nina’mamagof yu’ na sen yan-ña i sanhiyong, i tano’-ta, yan todu i tinanom siha. Todu tiempo malago’ yu’ na bai hu na’saonao gui’ i bidadå-hu put åmot sa’ malago’ yu’ na para u eyak put i mundo nåturåt ya i inifresi-ña siha.
Si Mama Lou ha bendisi i dinaña’ yan i tinanom siha antes di manånom ham. An manmunhåyan ham, guaha fina’nu’i as Mama Lou mamå’tinas Åmot Pasmun Sinagu. Este na åmot ma’u’usa para i manmañom. Prifekto na ha påtte este na klasen åmot sa’ meggai na taotao manmumamalålångu på’go na tiempo, durånten ya despues di Fanuchånan.
