Este na estoria tumulaika yan pumula si Rita Inos yan yumunga’ si L. Gue.
Un tiempo guaha un sapateru ni gof popble . Taya’ ha’ esta guinaha-ña na didide’ kueru ha’ anai nahong un pat sapatos. Ha chachak i kueru gi puengi kosa ki u lakse gi sigiente dia. Pues anai monhayan ha chachak i kueru, ha po’lo tatte ya humanao para u maigo’.
Gi sigiente ogga’an anai kahulo’ gi kama-ña, manaitai finene’na pues humuyong para u lakse i sapatos. Gigon tumalakhiyong, ha sodda’ un pat sapatos gi hilo’ lamasa. Mampos manman i sapateru. Humanao guatu ya ha pacha i pat sapatos. Todu i linakse manmaolek gi sagan-ñiha. Kulang ha’ mohon fina’tinas i mas maolek na sapateru gi hilo’ tano’. Ni ti apmam matto un taotao para u famahan sapatos. Ha chagi gue’ i taotao ya anai maolelek para i addeng-ña. Ha apasi i sapateru yan ha na’i ha’ mas meggai na salappe’ pot i guinaiya-ña ni sapatos-ña.
Pues esta i sapateru gai salappe’. Humanao ya mamahan ta’lo kueru para dos pat sapatos . Anai matto tatte ha chachak i kueru ya ha na’listo ta’lo para che’cho’-ña gi sigiente dia.
Anai makmata ta’lo gi sigiente ogga’an, manman sa’ ha sodda’ huyong ta’lo’ dos pat sapatos gi hilo’ lamasa. Matto ta’lo un taotao para u famahan. Ha sodda’ na gof ya-ña i sapatos. Ha fahan ya ha na’i i sapateru ta’lo mas meggai na salappe’ ki i balen i sapatos.
Pues nahong salappe’ para mas bula na kueru. I sapateru mamahan ta’lo kueru para balen kuatro pat sapatos. Eyu ta’lo na ha’ani, ha chachak todu i kueru ya ha na’listo gi hilo’ lamasa. Fatta ha’ para u lakse lao che’cho’ i sigiente dia i manlakse.
Anai kahulo’ ta’lo gi sigiente dia, ha sodda’ ta’lo kuatro pat sapatos. Ginen este na tiempo, maseha hafa chinachak-ña, siempre gi sigiente ogga’an ha sodda’ na esta monhayan. I sapateru pa’go na tiempo gof maolek lina’la’-ña. Esta ti ha sesiente chinatsaga yan ñalang.
Pues un puengi, antes di u puengen noche buena matata’chong i sapateru yan i asagua-ña. Esta i sapateru ha chachak i kueru ni para linakse-ña gi sigiente dia. “Hafa mohon ya ti maigo’ hit na puengi? Malago’ yo’ na bai hu li’e’ hayi lumalakse i china-chak-hu siha kueru.”
I asagua-ña kontento ni minalago’ i sapateru. Pues humalom ya umatok i dos gi halom kuatto ya manangga hayi para u fatto.
Gigon ha’ tatalo’ puengi, mali’e dos dikiki’ duendes na humalom. Mata’chong i dos gi hilo’ lamasa ya ma’aligao hafa para che’cho-ñiha.
Taya’ ni unu gi dos duendes minagagagu. Anai masodda’ i kueru, insigidas ma tutuhon macho’cho’ i dos. Ai na binibu manlakse i dikike’ na kannai-ñiha. Anai monhayan i linaksen-ñiha sapatos, ma’arekla tatte i kosas siha ya malagu huyong i dos.
Gi sigiente ogga’an, ilek-ña i asaguan i sapateru. “Eyu i dos duendes muna’gofsaga lina’la’-ta. Debi ta fa’nu’i siha lokkue’ nu i minagof-ta. Bai hu fa’tinasi siha magagon-ñiha yan sapatos-niha.”
Gi anai puengi, esta todu monhuyan i para nina’en-ñiha. Taya’ kueru mapo’lo gi hilo’ lamasa. Eyu ha’ mapo’lo i nina’en-ñiha i sapateru yan i asagua-ña.
Anai tatalo’ puengi ta’lo manugong halom i dos duendes para u facho’cho. Nina’manman i dos duendes sa’ taya’ dueru para u malakse. Pues mali’e’ i chinina yan i sapatos. Tuma’yok hulo i dos ni minagof-ñiha. Bibu minagagu i dos. Anai monhayan duru kumanta. Bumaila i dos gi halom guma’, tuma’yok gi hilo’ lamasa yan i siya. Sigi bumaila estaki humuyong i dos gi petta.
Ginen eyu na puengi para mo’na, taya’ esta nai binisita i sapateru ni dos duendes. Lo i lina’la’-ñiha mas mumaolek. Taya’ esta nai chatsaga i sapateru yan i asagua-ña.
