(Every week or so the Guam Museum will be sharing something in the CHamoru language about our history, culture and folklore. This week we are sharing a description of recent CHamoru funeral rituals, most importantly the bella or overnight wake.)
Antes na tiempo i manåmko’ yanggen mansen malångu ti u fanhånao para i espitat. Ga’on-ñiha na u fanmåtai gi katren-ñiha komu mañisiha yan i familia. Yanggen matungo’ seguru na esta
i malångu chachaflek, ma ågang si påle’ yan i techa para u tinaitayi ya u ma ayuda i malångu esta ki håfa denesponen yu’us.
Unu en unu i famagu’on manhånao guatu gi chachaflek na guella pat guello manmangagagao asi’i pat despensasion yanggen guaha na mana’piniti i amko’. Todu este na tiempo duranten i malangu-ña I amko’ mapupulan ha’ ni’ familia. I familia mankonfotmi nu i malago’ Yu’os.
Yanggen måtai i amko’, mamuda ensigidas. Malaknos huyong I katre-ña despues mafa’tinåsi ata’ut. Tenga i katpenteru gi sengsong bumolontario para u cho’gue i ata’ut. Ti meggai guihi na tiempo pentura pues ayu i hagon sibukao ma u’usa. Todos i familian I matai manlinitu ya matutuhon i lisåyu. I lisåyu matucha gi alas dosse gi talo’åni, alas ocho gi painge, yan lokkue’ gi alas dosse gi tatalo’ puengi. Yanggen tomotu’tu i matai mafåtto lokkue’ si påle’ para i responsu. Mababa i matai benti-kuatru oras. Mabella tolanoche esta i segenti diha.
Tenga i entieru i alas kuatru gi segenti talo’åni. I tataotao mana’hånao guatu gi gima’yu’os para mamisåyi i matai. Despues manhånao para i siputtura para u fanmanhafot. Todu este na tiempo
duranten i tomo’tuna i matai mandaña’ i manyettnu, mangumairi yan I manatungo’ manmamå’tinas para i tinaotao. Duranten i bella, mana’tane’ siha i tinaotao ni’ balaha.
Tenga alas kuatru gi talo’åni todos manmanhafot ya kada unu manmañule’ odda’ ya madaggao påpa’ gi naftan. Guaha gi manåmko’ sumångan na yanggen ti sumaonao hao mandaggao odda’ pues siempre mafa’nague hao. Despues di i entieru mandeskansa i taotao sa’ manmåtto ha’ ta’lo para i lisayon alas ocho. I lisåyu matucha nuebi noches despues guaha finakpo’. Todos ta’lo manmanayuda, manmamå’tinas para i manlisasayu.
Despues di finakpo’ lisayu guaha ta’lo lisayon guma’ para I membros i familia. Este na lisayu matucha ta’lo nuebi noches. I membros i familia manlutu un año. I mina’un año na tiempo matucha i lisåyon kompleaños.
