(Estague i primet na påtte para un antigu na estoria guinaiya giya Guåhan. Kada simåna u guaha nuebu na påtte gi estoria.)
****************
“Nobia kahulo’
Ya fa’gåsi i matå-mu
Sa’ u fåtto i nobio-mu
Ya lini’e’ ni churå-mu”
Gi guinife-ña, umasodda’ siha yan i guinaiyå-ña gi halom un guma’yu’os. Mandadanña i familian-ñiha gi oriya. Madåndandan i kampåña siha.
Ginen i mames na guinife-ña, si Maria ha hungok este na kånta gi bos nanå-ña.
Lao yinaho’ annai ha hasso na ti mismo guinife este. På’go na diha para u asodda’ magåhet i dos gi taiguihi na lugåt. Sa’ på’go i ha’ånen kasamiento.
Ha baba i matå-ña ya ha atan si nanå-ña, chumåchalek gi i semnak ogga’an. “Hagå-hu, kao listo hao? Este i mås impottånte na diha gi lina’la’-mu siempre. Hokkok sumutterå-mu.”
Ti ha fa’gasi migo’-ña lao manoppe’, “Hunggan nåna, gof listo yu’. Desde i primet bihia na umali’e’ ham, manguaguaiya ham na dos. Hagas humahami gi korason yan gi guinaiya, lao på’go para bei danña’ gi me’nan Yu’os lokkue’.”
Chumålek si nåna, “Este manhoben på’go. Anggen ti måtto i tiempo-mu tåya’ ora sipirao. Lao anggen måtto i tiempo-mu – “
Chumålek si Maria lokkue’ nu i botlehan i saina, “Hu tungo’ nåna, esta ti dimasiao hun. Lao hu prometi hao nåna, na ti este un kalentura na klasen siniente. Este i magåhet na klasen guinaiya.”
Humihot si nåna guatu gi matå-ña si Maria, “Ai hagå-hu, manhongge yu’ nu hamyo. Gof maolek na påtgon hao.” Ha hålla gotpe i såbanas gi katre, “Lachaddek hagå-hu, lachaddek ya minagagu!”
Kumahulo’ ensigidas si Maria ya ha osge’.
