Este na estoria, i estoria na’chalek tinge’ as Pale Eric Forbes. Gaige i estoria gi yo-ña website. Si Siñora Lillian Cruz, ha patte i estoria yan I Sakman I Fino’-ta.
Este na estoria na’chalek gof maolek sa’ i na’chalek i sinangan gaige gi uttimo yan nisisita tumaitai todu estoria. Lao chinaddek i estoria, ti mappot na tattiyi hafa susesede yan kulan gof malago hao na hasso nai’an na pot makpo’ i estoria. Yanngen matto gi uttimo, buente chumachalek hao.
Sen maolek si Pale Eric na sangan i estoria, sen maolek fino’-ña yan i bos-ña. Si Yu’os Ma’ase Pale para todu bida-mu para i fino’-ta yan siempre ma’chochonek mo’na i lengguahi-ta yan i kuttura-ta! Biba!
I estoria tinge’ as Pale Eric
http://paleric.blogspot.com/2022/05/beautiful-penmanship.html
Guaha audio para i estoria gi website Pale yan si Pale ha tumaitaitai i estoria. Gof bunitu i audio lokkue.
Estague i estoria:
“Ai i på’go na tiempo!” ilek-ña si nanå-ho. “Ti ma tungo’ i famagu’on man månge’! Puro ha’ “computer” yan “cell phone” nai man måmånge’!”
“Hunggan, nåna. Chaddek yumayas kanai-ñiha yanggen man mango’te pluma,” hu sangåne gue’.
“Ti un tungo’ i estorian tatå-ho bihu,” ilek-ña si nanå-ho.
“Sångan,” hu faisen gue’.
“Guaha che’lu-ña låhe si bihu-ho ni må’pos para Amerika annai hohoben ha’. Lao kada dos pat tres meses ha kattåttåye si bihu-ho ya ha sångan todo håfa nuebo ma susede gi lina’lå’-ña.”
“Si tiu-ho maolek na estudiånte giya Hagåtña åntes de ha dingu Guam. Ya guiya mås bonito tinige’-ña gi eskuela. Todo i tiempo guiya gumånna i premio para månge’.”
“Un dia humame yan si bihu-ho annai måtto i kåttan che’lu-ña. Ha baba ya ha taitai, ya kada nuebo ha taitai, chumålek halom si bihu-ho.”
“Annai monhåyan ha taitai, hu faisen si bihu-ho, ‘Håfa sinangån-ña si tiu-ho gi kåtta?'”
Manoppe si bihu-ho, “Ilek-ña na måtai i asaguå-ña, kemason i gimå’-ña yan ma aresta i lahi-ña.”
“Sus Maria!” ilek-ho. “Lao håfa na chumålek hahalom hao yanggen puro ha’ båba na notisia?”
Manoppe si bihu-ho, “Lao pot i sen bonito i tinige’-ña, na’magof ma taitai!”
